Allt að 20 gráðu hiti og sól í Danmörku

Á meðan kalt veður er allsráðandi á Íslandi búa frændur okkar Danir við þann sjaldgæfa lúxus að allt að 20 gráðu hiti er í Danmörku í dag með sól og blíðu. Það er afarsjaldgæft að svo mikill hiti mælist í landinu í miðjum október.

Í frétt um málið í Ekstra Bladet segir að ástæðan fyrir þessari veðurblíðu sé heitt veðurkerfi sem komið er alla leið til landsins frá Sahara eyðimörkinni.

Það fylgir með í fréttinni að Danir muni njóta þessara hlýinda allt fram á sunnudag.