Líkur á blóðregni í Danmörku í dag og á morgun

Veðurstofa Danmerkur hefur sagt Dönum að í dag og á morgun gætu þeir upplifað afar sjaldgæft veðurafbrigði sem kallast blóðregn, það er að það rigni rauðum dropum víða um landið.

Ekki er um hættulegt fyrirbrigði að ræða en það skýrist af því að veðurkerfi sem komið er alla leið frá Sahara eyðimörkinn liggur nú yfir Danmörku. Í því er fíngerður sandur sem veldur því að regnið verður rautt eða rauðleitt á litinn.

Í frétt um málið í Jyllands Posten er haft eftir veðurfræðingnum Henning Gisselö að menn ættu ekki að láta sér bregða þó rauð slikja myndist á húsum eða bílum þeirra og öðrum utanstokksmunum eins og áður hefur gerst þegar blóðregn hefur fallið í Danmörku.

Gisselö segir að það sé óvenjulegt að þetta veðurkerfi frá Sahara sé enn jafnöflugt og raun ber vitni enda komið langa leið til Danmerkur. Hið góða við það er að mikil veðurblíða ríkir nú í landinu og mælist hitastigið víða allt að 20 gráður. Búist er við að þessi veðurblíða haldist yfir helgina.