Meistaradeildarævintýri Stjörnustúlkna á enda

Stjörnustúlkur eru úr leik í Meistaradeild Evrópu eftir 3-1 tap gegn Zorkyi í Rússlandi í dag. Fyrri leik liðanna lyktaði með 0-0 jafntefli og því eygðu Stjörnustúlkur von um árangur í dag.

Þær héldu út í 33 mínútur er Dyatel kom rússneska liðinu yfir og þannig stóðu leikar í hálfleik. Dyatel gerði svo út um leikinn með sínu öðru marki í upphafi síðari hálfleiks.

Ruiz kom rússneska liðinu í 3-0 á 60. mínútu en Elva Friðjónsdóttir minnkaði muninn fyrir Stjörnuna ellefu mínútum fyrir leikslok.