Kennarar og starfsfólk fagna Hjallastefnunni

Kennarar og starfsfólk við Tálknafjarðarskóla segjast afa ánægð með að rekstri skólans í bænum verði breytt og að Hjallastefnan sé tekin upp í skólanum. Telja þau að aðkoma Hjallastefnunnar veðri mikil lyftistöng fyrir skólasamfélagið á Tálknafirði.

„Með tilkomu Hjallastefnunnar er starfsháttum hagað á þann veg að kennarar eru með nemendum öllum stundum, kennslumagn er meira en aðalnámsskrá segir til um. Kennsla byggir á gildandi aðalnámsskrám grunn- , leik- og tónlistaskóla, þar sem faglegt starf og umhyggja fyrir nemendum er höfð að leiðarljósi," segir í yfirlýsingu frá kennurum og starfsfólki. Þar segjast kennarar og starfsfólk jafnframt vera stolt af því að fá að vera þátttakendur í því metnaðarfulla starfi og uppbyggingu sem unnið sé innan veggja Tálknafjarðarskóla.

Hjallastefnan hóf að reka leik-, grunn- og tónlistarskóla sveitarfélagsins í haust án leyfis frá menntamálaráðuneytinu. Ætlaði sveitarfélagið að fá reynslu á nýja starfshætti skólans áður en sótt yrði um viðurkenningu. RÚV greindi svo frá því í gær að menntamálaráðuneytið hafi með bréfi, þann 21. september síðastliðinn, bent á að Hjallastefnan megi ekki reka eina grunnskólann á Tálknafirði.