Erlent

Virtur Eve Online spilari lést í sendiráðinu

BBI skrifar
Ráðist var á tvö bandarísk sendiráð á hinum táknræna degi 11. september.
Ráðist var á tvö bandarísk sendiráð á hinum táknræna degi 11. september. Mynd/CCP
Einn þeirra sem lést í árásinni á bandaríska sendiráðið í Líbýu í gær var ekki aðeins starfsmaður sendiráðsins heldur einnig einn virtasti Eve Online spilari heimsins.

Maðurinn hét í raun Sean Smith en í geimveröld Eve Online var hann þekktur sem geimskipið Vile Rat, stjórnandi hins alræmda Goonswarm bræðralags og lýðræðislega kjörinn fulltrúi spilara í Stjörnustjórnarráðinu (e. Council of Stellar Management).

Félagi Smith, bæði í hinum raunverulega heimi og stafrænum geimvíddum Eve Online, tilkynnti um dauða Vile Rat á heimasíðu sinni með þessum orðum:

Vile Rat, Sean Smith, vinur minn til sex ára, var starfsmaður sendiráðsins sem var drepinn í Benghazi af biluðum trúarofstækismönnum sem hneigðust til ofbeldisverka einmitt þann 11. september vegna einhverrar myndar sem var gerð í júlí. Árásirnar voru augljóslega hugsaðar til að vekja sem mesta fjölmiðlaumfjöllun; þær voru tvær (önnur í Egyptalandi hin í Líbýu), báðar beindust gegn sendiráðum á þessum táknræna degi 11. september. Árásirnar voru tilgangslausar en margir meiddust og einn besti vinur minn lét lífið.

Fjölskylda Smith er harmi slegin og bræðralaginu sem Smith stýrði í Eve Online hefur verið tilkynnt um fráfall hans.


Tengdar fréttir

Sendiherra Bandaríkjanna drepinn í Líbýu

Sjálfur sendiherra Bandaríkjanna í Líbýu var meðal þeirra sem létu lífið þegar ráðist var á sendiráðsskrifstofu Bandaríkjanna í Benghazi í Líbýu í gærkvöldi.

Mest lesið


Fleiri fréttir

Sjá meira


×

Mest lesið