Þungavigtarmenn meðal Repúblikana æfir út í Romney

Þungavigtarmenn í Repúblikanaflokknum eru æfir af reiði út í Mitt Romney. Reiðin er vegna þess að þessum forsetaframbjóðenda þeirra tókst í einni og sömu ræðunni að móðga nær helming bandarísku þjóðarinnar, flest fólk af latneskum uppruna í Bandaríkjunum og Palestínumenn.

Ræðan sem hér um ræðir var flutt á fundi með sterkefnuðum athafnamönnum sem hver um sig hafðí greitt 50.000 dollara eða um 6 milljónir króna fyrir kvöldverð með Romney, fé sem fór í kosningasjóð hans. Vefsíða Mother Jones hefur birt nokkra búta úr myndbandi af ræðunni sem vakið hafa verulega athygli.

Í fyrsta bútnum segir Romney að nær helmingur þjóðar sinnar séu bótaþegar sem lifi á framfæri hins opinbera og borgi ekki tekjuskatta. Í næsta bút tekst honum að móðga fólk af latneskum uppruna með frekar misheppnuðum brandara. Í þriðja bútunum gerir hann svo Palestínumenn æfa af reiði með yfirlýsingum um að þeir stefni aðeins að tortímingu Ísraels og því sé tilgangslaust að semja við þá um sjálfstætt ríki.

Það skal tekið fram að móðgunin í garð Palestínumanna er minnsta vandamálið að mati þungaviktarmanna í Repúblikanaflokknum. Það sem fer fyrir brjóstið á þeim er að þetta er langt í frá í fyrsta sinn sem Romney pissar í skóinn með yfirlýsingum sínum og hann eigi því í raun enga möguleika á sigri í komandi forsetakosningum.

Í umfjöllun Financial Times um málið segir að margir þekktir íhaldsmenn hafi slegist í hóp með Barack Obama Bandaríkjaforseta í að gagnrýna Romney vegna ummælanna. Þannig segir William Kristol ritstjóri hins íhaldssama blaðs Weekly Standard að ummæli Romney hafi verið bæði hrokafull og heimsk.

Þá kemur fram að tveir af frambjóðendum Repúblikanaflokksins í kosningunum til öldungadeildarinnar hafi tekið afstöðu gegn Romney vegna ummælanna en þetta eru Linda McMahon í Connecticut og Scott Brown í Massachusetts.