Eiginkona Bo Xilai dæmd til dauða

Gu Kailai, eiginkona kínverska stjórnmálamannsins Bo Xilai, var í morgun dæmd til dauða fyrir morðið á breska kaupsýslumanninum Neil Naywood, sem fannst látinn á hótelherbergi sínu í nóvember í fyrra.

Dómari komst að þeirri niðurstöðu að eiginkonan bæri ábyrgð á dauða hans með því að hafa eitrað fyrir honum en dómurinn er skilorðsbundinn í tvö ár. Það þýðir að ef hún brýtur ekki af sér næst tvö ár verður dómurinn mildaður í ævilangt fangelsi. Xilai var áður vonarstjarna í kínverskum stjórnmálum og allt benti til þess að hann yrði brátt meðal valdamestu manna landsins.

Morðmálið hefur hinsvegar gert út af við framavonir hans og var hann í kjölfarið rekinn úr framkvæmdastjórn Kínverska kommúnistaflokksins.