Sífellt fleiri börn í meðferð vegna offitu

Hundrað og fimmtíu börn hafa tekið þátt í meðferð vegna offitu á Barnaspítalanum á síðustu sex árum. Nokkur þeirra hafa verið byrjuð að þróa með sér sykursýki og því þurft lyfjagjöf.

Sex ár eru síðan að byrjað var að þróa sérstaka meðferð á Barnaspítala Hringsins til að hjálpa börnum sem glíma við offitu. Fyrir ári síðan var svo opnuð göngudeild á spítalanum fyrir of feit börn. Sífellt fleiri börn leita á deildina.

„Starfsemin hefur farið vel á stað. Samtals höfum við meðhöndlað 150 börn í hópmeðferð," segir Ragnar Bjarnason, yfirlæknir á Barnaspítala Hringsins.

Sem er þá á síðustu sex árum. Þá hafa læknar auk þess hitt fjölda barna á göngudeild. Ragnar segir misjafnt hvaða úrræði eru notuð. Sumum barnanna er til að mynda kennt að hreyfa sig og fylgst með mataræði þeirra. Önnur þurfa jafnvel á lyfjum að halda.

„Það eru þau börn sem eru komin með forstig sykursýki af týpu 2."

Ragnar segir erfitt að segja til um hver árangurinn verði til framtíðar þar sem aðeins hefur verið boðið upp á meðferðina í sex ár.

„Við getum ekkert sagt hvernig þessi börn verða þegar þau verða fimmtug eða sextug," segir Ragnar. „Skammtímaárangurinn hefur verið mjög góður og við höfum séð það að þau börn sem hafa farið í gengum hópmeðferð og náð árangri þar. Þau eru að haldast sem hópur þau sem sagt þyngjast ekki aftur."

Flest börnin sem leita á deildina vera frá sjö ára og upp úr. Ragnar segir mikilvægt að börn sem eru of feit fái aðstoð.

„Sjö til tólf eða þrettán ára barn er ekki búið að fullmóta sinn lífstíl og það getur þurft tiltölulega litlar breytingar til að hindra það að einstaklingur verði of feitur eða fái fylgikvilla síðar meir."