Liverpool-kötturinn slær í gegn á internetinu

Kötturinn sem náði að læðast inn á Anfield, heimavöll knattspyrnuliðsins Liverpool, í gærkvöldi hefur slegið í gegn á internetinu. Stöðva þurfti leikinn í þrjár mínútur á meðan kisi kannaði völlinn en það voru svo vallarstarfsmenn sem tóku hann í fangið og komu honum á betri stað.

Aðeins nokkrum mínútum eftir að kisi hljóp inn á völlinn var búinn til Twitter-aðgangur fyrir hann. Rúmlega 17 þúsund manns elta hann nú á samskiptasíðunni en hann heitir einfaldlega @AnfieldCat.

Ekki er vitað hvað varð um köttinn en ýmsar veðmálasíður hafa nú gert notendum kleift að veðja á hvort að hann komi aftur inn á völlinn þegar Liverpool keppir við Manchester United um helgina.

Hægt er að sjá köttinn hlaupa um á vellinum í myndskeiðinu hér að ofan.