Veigar Páll reynir að fá sig lausan frá Vålerenga

Knattspyrnumaðurinn Veigar Páll Gunnarsson hefur átt erfitt uppdráttar undanfarið hjá liði sínu Vålerenga og er nú svo komið að hann vinnur að því hörðum höndum að komast frá félaginu. Veigar vonast til að finna sér lið á einu af Norðurlöndunum áður en félagsskiptaglugganum verður lokað þann 31. ágúst.

Þetta kom fram í útvarpsþættinum Boltanum á X-inu í morgun þar sem Veigar var í viðtali.

"Ég er að vinna í því þessa dagana að finna mér annað lið. Það gæti eitthvað gerst í þeim málum á næstu dögum. Ég veit ekki hvort ég verð lánaður eða seldur, það verður bara að koma í ljós. En ég og umboðsmaður minn vonumst til að finna einhverja lausn áður en glugginn lokast í enda mánaðarins," sagði Veigar Páll.

Veigar segist vera í toppformi og standa sig yfirleitt vel á æfingum með félaginu. Engu að síður eru tækifærin með liðinu af skornum skammti.

"Ég hef svosem ekki sest niður með þjálfaranum og rætt þessi mál. En ég skynja það og veit að honum líkar eiginlega bara ekkert við mig sem leikmann. Því eru aðrir leikmenn sem hann telur henta betur liðinu að spila en ekki ég. Það er því í raun engin ástæða fyrir mig að fá einhverjar frekari útskýringar frá honum."

Veigar Páll hefur ekki verið valinn í íslenska landsliðið síðan þáverandi þjálfari liðsins, Ólafur Jóhannesson, rak hann úr hópnum vegna agabrots fyrir leik Íslands gegn Kýpur í september í fyrra. Hann telur afar litlar líkur á að hann leiki aftur með íslenska landsliðinu.

"Ég held að landsliðið sé alveg búið fyrir mig. Það er í raun svo fjarstætt akkúrat núna að ég spái ekki einu sinni í því. En eins og ég hef alltaf sagt þá er það mikill heiður að fá að spila fyrir þjóð sína og ég mun áfram gefa kost á mér", sagði Veigar Páll sem á að baki 34 landsleiki og sex mörk.

Veigar, sem er 32 ára, vonast til að vinna fyrir sér sem atvinnumaður í að minnsta kosti eitt ár í viðbót en koma svo heim til Íslands eftir það. Og þá kemur bara eitt lið til greina.

"Þegar ég kem heim fer ég 100 prósent í Stjörnuna. Þetta er auðvitað móðurklúbburinn - maður er alltaf Stjörnumaður," sagði Veigar Páll að lokum.