Á þriðja hundrað látnir í Íran

Áætlað er að um 250 liggi í valnum eftir tvo snarpa jarðskjálfta sem riðu yfir norðvesturhluta Íran í gær. Yfirvöld telja að um tvö þúsund hafi slasast og að eignatjón sé stórfellt.

Símasamband á svæðinu liggur niðri. Vegir eru stórskemmdir og eru samgöngu víða úr skorðum. Skjálftarnir riðu yfir með stuttu millibili.

Sá fyrri mældist 6.4 stig að stærð en sá seinni var 6.3. Að minnsta kosti 17 eftirskjálftar fylgdu í kjölfarið, sá stærsti var 4.7 stig.

Skjálftamiðjan var í rúmlega 60 kílómetra fjarlægð frá borginni Tabriz. Björgunaraðgerðir standa enn yfir en björgunarsveitir hafa unnið í alla nótt við að leita í rústum þeirra þorpa sem urðu fyrir áhrifum frá skjálftunum.

Bráðabirgðaskýlum hefur verið komið fyrir á íþróttaleikvanginum í Tabriz og er talið að um sextán þúsund hafi gist þar í nótt.