Skiptar skoðanir um Ryan

Skiptar skoðanir eru um þá ákvörðun repúblikanans Mitt Romney að tilnefna hinn 42 ára gamla fulltrúardeildarþingmann Paul Ryan sem varaforsetaefni sitt, en Ryan, sem hefur setið 14 ár í fulltrúadeildinni hefur allan sinn feril einbeitt sér að einu máli, fjárlögum bandaríska ríkisins.

Ryan sem er mikill frjálshyggjumaður, gaf fyrir tveimur árum út bókina „Young Guns, A New Generation of Conservative Leaders" þar sem hann lýsir hugsjónum sínum um minna ríkisvald og varð í kjölfarið að stjörnu á einni nóttu meðal fylgismanna Teboðshreyfingarinnar svokölluðu, sem berst fyrir lágum sköttum og minni ríkisumsvifum.

Tilnefning Ryan þykir styrkja Romney gagnvart íhaldssömum kjósendum og þá þykir hann auka sjarma framboðsins, en hann á rætur sínar úr millistétt og er mikill aðdáandi ruðningsliðsins Green Bay Packers. Forsetakosningarnar verða í byrjun nóvember næstkomandi.