Búist við margmenni á Heathrow

Um sex þúsund íþróttamenn munu fara um flugstöð sem var sett upp sérstaklega vegna Ólympíuleikana, eftir því sem fram kemur í fréttum Daily Mail í dag.

Til að flýta fyrir var íþróttamönnum boðið að skrá inn farangur sinn í Ólympíuþorpinu núna um helgina og var farangrinum svo ekið umsvifalaust á Heathrow. Þegar íþróttamennirnir koma svo í flugstöðina í dag mun heiðursvörður sjálfboðaliða svo taka á móti þeim. Að öðru leyti hafa starfsmenn Heathrow flugvallar ekki viljað gefa upp neitt um það hvernig íþróttamennirnir verða kvaddir. Vegna þess að yfirmenn Heathrow flugvallar voru svo forsjálir að opna aukaflugstöð fyrir Ólympíuleikana er ekki búist við því að tafir verði á flugi um Heathrow þrátt fyrir annríkið í dag.

Búist er við því að 70 þúsund manns fari um Gatwick flugvöll í dag, sem er næststærsti flugvöllurinn í Lundúnum. Það er um fimmtán prósentum meira en á hefðbundnum degi í ágústmánuði segir talskona flugvallarins í samtali við Business Week.