Ákvörðun ráðamanna í Ekvador væntanleg

Yfirvöld í Bretlandi munu koma í veg fyrir að Julian Assange, stofnandi upplýsingaveitunnar WikiLeaks, fari úr landi þó svo að stjórnvöld í Ekvador veiti honum hæli. Ráðamenn í Ekvador munu tilkynna um ákvörðun sína í dag.

Assange hefur haldið til í sendráði Ekvador í Lundúnum frá því í júní en hann krefst þess að vera veitt hæli í landinu. Þetta gerði hann til að komast hjá því að verða framseldur til Svíþjóðar þar sem sem hann hefur verið ákærður fyrir kynferðisbrot.

Yfirvöld í Bretlandi telja sig bera lagalega skildu til að framselja Assange enda heimili dómsúrskurður slíkar aðgerðir. Bresk yfirvöld hafa hótað að ganga inn í sendiráðið og handsama Assange. Margir hafa gagnrýnt hótanir Breta. Einna helst Ricardo Patino, utanríkisráðherra Ekvador. Hann sagði í gær að aðgerðir Breta brjóti í bága við alþjóðasáttmála og Vínarsáttmálann um samskipti ríkja.

Fjölmennt lið lögreglu er nú fyrir utan sendiráðið í hjarta Lundúna. Þá hafa mótmælendur og aðgerðarsinnar einnig mætt á staðinn til að styðja Assange. Það sló í brýnu milli lögreglumanna og mótmælenda í morgun og voru þrír handteknir í kjölfarið.

Búist er við að ráðamenn í Ekvador taki ákvörðun í máli Assange seinna í dag. Yfirvöld í Bretlandi hafa hins vegar gefið út að ef Assange verði formlega veitt hæli í Ekvador þá muni það ekki hafa nein áhrif á stöðu mála.

Sjálfur hefur Assange lýst því yfir að hann óttist mjög að verða sendur til Svíþjóðar. Hann telur að þarlend yfirvöld muni senda hann aftur til Bandaríkjanna. Þá muni langar yfirheyrslur bíða hans þar vegna birtingar bandaríska leyniskjala sem WikiLeaks stóð fyrir.