Minntust þess að 35 ár eru liðin frá andláti Presley

Priscilla Presley, fyrrverandi eiginkona rokkgoðsins Elvis Presley, og Lisa Marie einkadóttir þeirra vöktu gríðarlega hrifningu þegar þær birtust óvænt í Graceland þar sem þess var minnst í gær að 35 ár eru liðin frá því að Elvis lést.

Tugþúsundir manna voru við minningarathöfnina sem haldin var rétt hjá þeim stað þar sem jarðneskar leifar Elvis eru. Mæðgurnar þökkuðu aðdáendum Elvis fyrir þá hollustu sem honum hefur verið sýnd.

Þetta var í fyrsta sinn sem mæðgurnar koma saman fram á þessari minningarathöfn, sem hefur verið haldin árlega frá árinu 1980, en Elvis lést sextánda ágúst 1977.

Priscilla sagði við athöfnina að það væri ótrúlegt að sjá alla þá þúsundir aðdáenda sem voru viðstaddir.

„Hann elskaði aðdáendur sína og þetta er sönnun þess að þið elskið hann, eins og Lísa sagði. Við þökkum ykkur kærlega fyrir allt sem þið gerið til að halda nafni hans áfram lifandi. Ég þakka ykkur aftur kærlega fyrir," sagði hún.

Lisa Marie Presely sagði á sama tíma að hún elskaði aðdáendur föður síns vegna þess hversu trúir þeir hefðu verið honum. Hún viðurkenndi líka að hún hefði verið feimin við að koma fram opinberlega á minningarathöfnum fyrri árum.

Presley var einungis fjörtíu og tveggja ára gamall þegar hann lést úr hjartaáfalli eftir langvarandi misnotkun lyfja.