Crowe mun fá pláss á Menningarnótt

Russell Crowe hafði ekki haft samband við Höfuðborgarstofu í Reykjavík til að falast eftir tónleikastað, þegar Vísir spurðist fyrir um það í morgun. Á Twittersíðu sinni segir hann frá því að góðvinur sinn, kanadíski leikarinn og tónlistarmaðurinn Alan Doyle, er nú landinu og segir Crowe að þeir vilji halda stutta tónleika um helgina.

Guðmundur Birgir Halldórsson, verkefnastjóri Menningarnætur, hafði ekki heyrt af áhuga Crowe þegar Vísir ræddi við hann í morgun. „En við erum alltaf tilbúin til þess að greiða leið fólks sem er tilbúið til þess að koma fram á Menningarnótt," segir Guðmundur. Það verði því líklegt að hægt verði að finna stað fyrir Crowe ef þurfa þykir.