Bandarísku fótboltastelpurnar tóku gullið á þriðju leikunum í röð

Bandaríkin tryggði sér í kvöld sigur í knattspyrnukeppni kvenna á Ólympíuleikunum í London þegar bandarísku stelpurnar unnu 2-1 sigur á Heimsmeisturum Japans í úrslitaleiknum fyrir framan rúmlega 80 þúsund manns á Wembley.

Þetta eru þriðju Ólympíuleikarnir í röð sem bandaríska kvennalandsliðið tekur gullið á leiknunum en þær unnu 1-0 sigur á Brasilíu í Peking 2008 og unnu Brasilíu 2-1 í Aþenu fjórum árum fyrr. Bandaríkin vann einnig gull á leikunum í Atalanta 1996 en þær bandarísku fengu silfur á leikunum í Sydney 2000.

Bandaríska liðið hefndi þar með fyrir tapið fyrir Japan í úrslitakeppni Heimsmeistarakeppninnar í Þýskalandi fyrir ári síðan en þær japönsku unnu þá í vítakeppni.

Carli Lloyd skoraði bæði mörk bandaríska liðsins í úrslitaleiknum, eitt í upphafi hvors hálfleiks. Yuki Ogimi minnkaði muninn á 63. mínútu og bandarísku stelpurnar stóðust síðan stórsókn Japans á lokakafla leiksins.

Carli Lloyd skoraði sigurmarkið á móti Brasilíu í gulleiknum fyrir fjórum árum og kann greinilega vel við sig í úrslitaleik Ólympíuleikanna.