Brassar yfirspiluðu Breta

Ólympíulið Brasilíu í knattspyrnu lagði kollega sína frá Bretlandi að velli 2-0 á Riverside-vellinum í Middlesbrough í kvöld.

Sandro, miðjumaður Tottenham, kom Brasilíu á bragðið með marki eftir tólf mínútna leik og Neymar tvöfaldaði forskot gestanna úr vítaspyrnu skömmu fyrir hálfleik.

Breska liðið sá aldrei til sólar sem hlýtur að teljast áhyggjuefni fyrir landsliðsþjálfara þeirra, Stuart Pearce. Um eina æfingaleik Breta fyrir leikana var að ræða.

Oscar, sem talinn er á leiðinni til Chelsea, þótti sérstaklega góður í leiknum og skapaði góð færi fyrir samherja sína. Auk hans voru menn á borð við Thiago Silva, Hulk, Juan og Rafael í liðinu auk fyrrnefndra Sandro og Neymar.

Ryan Giggs, Craig Bellamy og Micah Richards voru allir í byrjunarliði Breta.

Hafa skal í huga að allir átján leikmennirnir í Ólympíuhópi Brasilíu hafa spilað A-landsleik fyrir þjóð sína. Aðeins sjö leikmenn breska liðsins hafa spilað A-landsleik fyrir England eða Wales.