Seinka þurfti leik Norður-Kóreu vegna rangs fána

Leikmenn kvennalandsliðs Norður-Kóreu í knattspyrnu gengu af velli skömmmu eftir að liðið hóf upphitun sína fyrir leikinn gegn Kólumbíu á Ólympíuleikunum í dag.

Ástæðan var sú að fáni Suður-Kóreu var fyrir mistök birtur á risaskjá á Hampden-leikvanginum í Glasgow samhliða upptalningu á byrjunarliði liðsins.

Leikmenn landsliðsins mættu aftur til leiks um 45 mínútum eftir að leikur átti að hefjast en þá hafði hinum ranga fána verið skipt út fyrir hinn rétta. Leikurinn hófst að lokum rúmri klukkustund á eftir áætlun.

Atvikið þykir skammarlegt fyrir skipuleggjendur leikanna sem hafa átt fullt í fangi með að vekja áhuga fólks á knattspyrnuleikjunum sem fram fara í Glasgow. Um 15 þúsund manns sáu Bandaríkin leggja Frakka að velli fyrr í dag en tvöfalt fleiri boðsmiðum hafði verið komið í dreifingu.

Skipuleggjendur leikanna hafa sent frá sér afsökunarbeiðni til landsliðs Norður-Kóreu.