Shevchenko skiptir fótboltanum út fyrir pólitíkina

Úkraínumaðurinn Andriy Shevchenko hefur ákveðið að leggja fótboltaskóna á hilluna og snúa sér að stjórnmálum í heimalandinu. Hann tilkynnti þetta formlega í fréttatilkynningu seint í gærkvöldi sem var send í gegnum félag hans Dynamo Kyiv.

„Það kemur kannski mörgum á óvart að það verður enginn fótbolti í minni framtíð. Hún mun tengjast pólitík," sagði Shevchenko. Hann endaði ferillinn sinn með Dynamo Kyiv þar sem hann hófst fyrir tæpum tveimur áratugum.

Shevchenko er orðinn 35 ára gamall og var talinn einn af bestu sóknarmönnum heims þegar hann spilaði með AC Milan og Chelsea. Hann spilaði sína síðustu fótboltaleiki á Evrópumótinu í sumar.

Shevchenko gaf ekkert upp um hvaða stjórnmálaflokkur myndi njóta góðs af þjónustu hans eða hvort að hann ætlaði að stofna sinn eigin flokk fyrir kosningarnar í október.

Shevchenko er ekki eini heimsþekkti íþróttamaðurinn sem mun bjóða sig fram því boxarinn Vitaly Klitschko verður í framboði með sinn eigin flokk sem Udar eða verkfall upp á íslenska tungu.