Prandelli: Reyndum að keyra okkur ekki út

Cesare Prandelli, landsliðsþjálfari Ítala, var að vonum svekktur eftir 4-0 tapið gegn Spánverjum í úrslitaleik Evrópumótsins í Kænugarði í kvöld. Hann var þó stoltur af leikmönnum sínum.

„Við sáum strax í upphafi að Spánverjarnir virkuðu ferskari en við enda fór mikil orka hjá okkur í leikina í vikunni," sagði Prandelli og sagði lið sitt í sjálfu sér ekki hafa gert neitt rangt í leiknum.

„Við áttuðum okkur strax á því að við þyrftum að fara að öllu með gát til að þess að keyra okkur ekki út því við vorum í slæmum málum líkamlega séð," sagði Prandelli en skilja má á orðum hans að ítölsku leikmennirnir hafi verið þreyttir eftir leikina í átta liða og undanúrslitum keppninnar.

Prandelli getur borið höfuðið hátt. Fæstir áttu von á að Ítalir kæmust alla leið í úrslitaleikinn en liðið lenti í skakkaföllum fyrir mótið og voru væntingar í lágmarki.

„Þetta var frábært mót hjá okkur og ég óska strákunum til hamingju," sagði Prandelli.

Prandelli tók við landsliði Ítala að loknu heimsmeistaramótinu í Suður-Afríku árið 2010. Þar hafnaði landsliðið í neðsta sæti síns riðils sem innihélt landslið Paragvæ, Slóvakíu og Nýja-Sjálands.