Fyrsta konan kosin í framkvæmdarstjórn FIFA

Lydia Nsekera mun brjóta blað í knattspyrnusögunni þegar hún verður formlega tekin inn í framkvæmdarstjórn FIFA, Alþjóðaknattspyrnusambandsins, síðar í vikunni.

Nsekera er nefnilega fyrsta konan frá upphafi sem tekur sæti í stjórninni. Hún er forseti knattspyrnusambands Afríkuríkisins Búrúndí og verður formlega vígð inn í stjórnina á þingi FIFA í Búdapest á föstudaginn.

Nsekera tók við stjórn knattspyrnusambandsins í heimalandi hennar árið 2004 og kom rekstrinum í lag en hann hafði verið í mikilli óreglu. Síðan þá hefur fjárhagur sambandsins verið stöðugur og rekstur knattspyrnudeilda og landsliða með miklum sóma.