Útgerðarmaður kvótalauss fiskiskips úr Vestmannaeyjum ætlar næstu þrjá mánuði að nýta skipið til olíuleitar á Jan Mayen-hryggnum og segir milljarða tækifæri bíða Íslendinga á þessu sviði. Akureyri á von á umtalsverðum þjónustutekjum í sumar.

Sennilega halda margir að olíuleit sé eitthvað sem er langt inni í framtíðinni hjá Íslendingum. Eigandi 100 tonna stálskips, sem verið er að undirbúa til brottfarar í Keflavíkurhöfn, sér tækifærin hins vegar þegar komin og hann er að leggja af stað á Drekasvæðið í næstu viku.

Valberg VE heitir skipið, var áður Saxhamar SH, en nú hefur útgerðarmaðurinn Garðar Valberg Sveinsson samið um að það verði eitt af þremur fylgdarskipum rannsóknaskipsins Nordic Explorer við hljóðbylgjumælingar á Jan Mayen-hryggnum. Eftirlitsmenn frá Bretlandi og Noregi á vegum eiganda Nordic Explorer voru í dag að taka út skip Garðars en hann hefur undanfarin sex ár notað það í þjónustu við olíuleit, bæði við Noreg og Grænland.

Í viðtali í fréttum Stöðvar 2 kemur fram að rannsóknarleiðangurinn mun nota Akureyri sem þjónustuhöfn og Garðar lýsir þeim umsvifum sem þar skapast í sumar og fram eftir hausti við að þjónusta skipin og fjölmennar áhafnir þeirra.

„Það verður nóg að gera. Það vantar allskonar þjónustufólk í kringum þetta. Það eru bara öll tækifærin opin," segir Garðar um möguleika Íslendinga til tekjöflunar af olíuleit. Spurður hvort hægt sé að hafa mikinn pening upp úr þessu svarar hann:

„Jááá, það myndi ég segja. Það eru milljarðar og milljarðar í sambandi við svona verkefni. Þetta skapar óhemju fyrir okkur. Óhemju."