Roger Milla rekinn úr stöðu heiðursforseta

Roger Milla, stjarna Kamerún á HM á Ítalíu 1990 og elsta leikmaðurinn sem hefur skoraði í úrslitakeppni HM í fótbolta, er ekki lengur heiðursforeti knattspyrnusambands Kamerún. Hann hefur verið rekinn eftir að hafa gagnrýnt forráðamenn sambandsins harkalega í þó nokkurn tíma.

Roger Milla hefur verið óhræddur við að gagnrýna forystuna fyrir slaka frammistöðu og þá var hann mjög ósáttur við langt bann Samuel Eto'o fyrir að standa fyrir verkfalli landsliðsmanna vegna ógreiddra bónusa.

Milla er orðinn 59 ára gamall en enginn Afríkumaður hefur skorað fleiri mörk í úrslitakeppni HM en hann skoraði fimm, fjögur á HM 1990 þegar hann var 38 ára og eitt fjórum árum síðar á HM í Bandaríkjunum.

„Ég er búinn að vera að bíða eftir þessu í langan tíma. Ég var að hjálpa sambandinu að sjá hlutina í skýru ljósi svo að fótboltinn í Kamerún fái geðheilsuna á ný," sagði Roger Milla en ákvörðunin um að reka hann var tekin á þingi sambandsins.

„Ég get sagt ykkur það að við stöndum í baráttu um að koma þessari stjórn frá völdum," sagði Milla.

Samuel Eto'o var dæmdur í fimmtán leikja bann fyrir að standa fyrir verkfallsaðgerðum vegna ógreiddra bónusa en bannið var síðan minnkað niður í átta mánuði (4 leikir) eftir harða opinbera gagnrýni Milla.