Fimm látnir í Oakland - árásarmaðurinn í haldi

Lögreglan í Oakland hefur haft hendur í hári mannsins sem hóf skotárás í kristilegum skóla fyrir stuttu. Samkvæmt AP fréttastofunni eru að minnsta kosti fimm látnir. Þá eru nokkrir særðir og hafa fjórir verið fluttir á spítala.

Á vef breska ríkisútvarpsins kemur fram að árásarmaðurinn hafi skotið á nemendur í kennslustofu í Oikos-háskólanum í Oakland.

Oikos er kristilegur skóli en guðfræði kennd þar ásamt tónlistarfræði og hjúkrun.

Sjónvarpsstöðvar í Bandaríkjunum hafa sýnt myndir af særðum sem fluttir eru á brott úr skólanum.

Fregnir af málinu eru enn óljósar. Þannig greinir Sky fréttastofan frá því að sex séu látnir.