Um 200 breskir hermenn í hópslagsmálum á bar

Yfirstjórn breska hersins reynir nú að finna út hvað snýr upp og hvað snýr niður í hópslagsmálum breskra hermanna á bar í Kenía.

Í frásögnum þarlendra fjölmiðla segir að um hópslagsmál af stærri gerðinni var að ræða því alls tóku um 200 hermenn þátt í þeim. Þau áttu sér stað á Nanyuki hótelinu sem er skammt frá stórum æfingabúðum hersins. Í kjölfarið voru fimm af hermönnunum fluttir á næsta spítala í Nairobi höfuðborg landsins til meðhöndlunar við sárum sínum.

Í frásögn blaðsins Daily Nation segir að slagsmálin hafi byrjað á bar hótelsins og að í þeim hafi allar rúður barsins brotnað sem og flöskur og glös. Þá hafi húsgögnum barsins verið rústað.

Breska varnarmálaráðuneytið vill lítið tjá sig um málið. Viðurkennir þó að hópslagsmálin hafi átt sér stað og að „töluverður fjöldi hermanna" hafi tekið þátt í þeim eins og talskona ráðuneytisins orðar það. Að öðru leyti vildi hún aðeins segja að málið væri í rannsókn.

Samkvæmt heimildum Daily Nation voru þetta írskir hermenn að slást við skoska félaga sína.