Danskt par dæmt í háa sekt og fangelsi fyrir að segjast vera skilin

Par í Frederikshavn í Danmörku hefur verið dæmt til að greiða bæjarfélaginu rúmlega 600 þúsund danskar kr. eða nær 14 milljónir kr. fyrir umfangsmikil bótasvik. Í næstum fimm ár deildi parið hjónasæng en sagðist vera skilið á opinberum pappírum.

Í umfjöllun um málið í blaðinu BT segir að með því að segjast vera skilin og búa í sitthvoru lagi fékk parið umtalsvert hærri bætur úr danska félagskerfinu. Þar má m.a. nefna hærri barnabætur og húsaleigubætur, frítt pláss á leikskóla fyrir börn sín og sérstakar aukagreiðslur í lífeyrissjóð.

Svikin hófust árið 2006 og stóðu fram til ársins 2010 þegar bæjarfélagið komast að hinu sanna í málinu. Fyrir utan að greiða framangreinda sekt fékk parið eins árs fangelsisdóm hvort um sig og konan var þar að auki dæmd til að sinna samfélagsþjónustu í 150 tíma.