Ban gagnrýnir stjórnvöld í Sýrlandi

Ban Ki-moon, framkvæmdarstjóri Sameinuðu Þjóðanna, gagnrýnir yfirvöld í Sýrlandi fyrir að herða árásir sínar gegn andspyrnumönnum í aðdraganda vopnahlés sem samið hefur verið um.

Hann segir að árásirnar séu þvert á loforð yfirvalda í landinu um að vinna að friðarumleitunum við andspyrnumenn.

Það var Kofi Annan sem hafði milligöngu um vopnahléið en hann ferðaðist til Sýrlands fyrir hönd Sameinuðu Þjóðanna og Arabandalagsins.

Andspyrnumenn í Sýrlandi segja að hundruð manna hafi fallið í árásum sýrlenska hersins á síðustu sólarhringum.

Herinn hefur látið sprengjum rigna fyrir þéttbýl svæði í landinu undanfarið og virðist ekkert lát vera á því þrátt fyrir loforð um vopnahlé sem hefjast á í næstu viku.