Ættingjar leggja í minningarsiglingu um Titanic

Ættingjar þeirra sem létust þegar breska farþegaskipið RMS Titanic sökk í sæ héldu í sjóferð í dag til minningar um fórnarlömbin. Sunnudaginn 15. apríl næstkomandi verða hundrað ár liðin frá því að Titanic sökk.

Rúmlega 1.300 farþegar eru nú um borð í skipinu MS Balmoral en það hélt úr höfn í Southampton í dag. Skipið mun sigla nákvæmlega sömu leið og Titanic gerði í jómfrúarferð sinni.

Um 1.500 manns létust þegar Titanic sökk eftir að hafa rekist á borgarísjaka undan við Nýfundnaland.

Á sunnudaginn mun MS Balmoral nálgast Nýfundnaland og staðnæmast á nákvæmlega sama stað og Titanic sökk.

Minningarathöfn verður haldin um borð í skipinu klukkan 02:20 en það var á því augnabliki sem Titanic hvarf í djúpið.

Nokkrir farþegar um borð í MS Balmoral hafa tekið með sér blómsveiga og erfðagripi sem þeir munu kasta í hafið.

Farþegarnir koma frá 20 löndum. Á meðal þeirra eru ættingjar, rithöfundar, sagnfræðingar og áhugamenn um sögu RMS Titanic.