Berlínarbúar í uppnámi vegna nauðgana á 8 ára skólastúlkum

Íbúar í Berlín eru í miklu uppnámi þessa dagana því á undanförnum vikum hefur þremur 8 ára skólastúlkum verið nauðgað eða tilraun gerð til að nauðga þeim í þremur grunnskólum í borginni.

Í fyrsta tilvikinu var 8 ára grunnskólanema nauðgað á klósettinu í Humboldthain skólanum í Wedding hverfinu í upphafi mánaðarins. Ódæðismaðurinn kom óboðinn inn á skólalóðina en þegar kennari hafði afskipti af honum sagðist hann aðeins vera að bíða eftir öðrum kennara. Í staðinn fór ódæðismaðurinn inn á klósettið og framdi glæp sinn.

Viku síðar var reynt að nauðga annarri 8 ára stúlku inn á klósetti grunnskólans í Frohnau. Sú nauðgun tókst ekki því skólafélagi stúlkunnar kom að þeim og við það lagði ódæðismaðurinn þá á flótta.

Í þriðja tilvikinu í síðustu viku var svo 8 ára stúlku nauðgað í grunnskóla í Friedenau hverfinu. Að sögn þýsku lögreglunnar passar lýsingin á þessum þremur mönnum ekki saman og því telur lögreglan að um þrjá gerendur sé að ræða í þessum þremur nauðgunarmálum.

Enginn hefur enn verið handtekinn vegna þessara nauðgana.