Heppni lottó-spilarinn ófundinn

Heppinn lottóspilari frá Baltimore í Bandaríkjunum virðist hafa fengið allar tölur réttar í ofurlottóinu sem dregið var úr í gær. Mikið fár greip um sig á meðal Bandaríkjamanna vegna leiksins en vinningurinn voru litlar 640 milljónir dollara. Það gera 81 milljarður íslenskra króna. Það eru 20 milljörðum meira en sjávarútvegurinn græddi á Íslandi á síðasta ári.

AP fréttaveitan greinir frá því að vinningsmiðinn var keyptur í Baltimore-sýslu í Bandaríkjunum en ekki er ljóst hver það var sem vann pottinn eða hvort fleiri hafi verið með allar tölur réttar. Lukkutölurnar voru eftirfarandi: 02-04-23-38-46, og ofurtalan var 23.

Bandaríkjamenn fjárfestu í lottóinu fyrir einn og hálfan milljarð dollara. Sigurlíkurnar voru 1 á móti 176 milljónum.