Rússar munu styðja ályktun Öryggisráðsins

Yfirvöld í Rússlandi tilkynntu í dag að þau muni styðja ályktun Öryggisráðs Sameinuðu Þjóðanna um sendiferð Kofi Annans til Sýrlands.

Annan fer fyrir hönd Arababandalagsins til Sýrlands í þeirri von um að hægt verði að semja um vopnahlé og að færi gefist á að koma neyðargögnum til landsins.

Að auki mun Annan reyna að stuðla að pólitískri úrlausn á átökum andspyrnuhópa og stjórnar Bashar al-Assads, forseta Sýrlands.

Utanríkisráðherra Rússlands sagði að samþykkt ályktunarinnar væri háð því að yfirvöldum í Sýrlandi verði ekki settur úrslitakostur af hálfu Sameinuðu Þjóðanna.

Búist er við að Öryggisráðið fundi um málið í dag - ekki er þó vitað hvort að kosið verði um ályktunina fyrr en seinna í vikunni.

Átökin í Sýrlandi hafa staðið yfir í rúmt ár. Samkvæmt Mannréttindaráði Sameinuðu Þjóðanna hafa rúmlega 8.000 manns fallið í átökunum.