Meintur fjöldamorðingi ætlar að gefast upp seinna í dag

Hinn meinti fjöldamorðingi sem franska lögreglan hefur umkringt í fjölbýlishúsi í borginni Toulouse segir að hann muni gefast upp fyrir lögreglunni síðar í dag.

Lögreglan hefur gefið út nafn hans sem er Mohammed Merah. Í nýjustu fréttum frá Toulouse segir að lögreglan hafi fundið nokkurt magn vopna í bíl sem stóð fyrir utan fjölbýlishúsið. Sjálfur er maðurinn vopnaður bæði Uzi og Kalashnikov hríðskotabyssum.

Eins og fram koma í fréttum í morgun réðist sérsveit frönsku lögreglunnar á íbúð mannsins í nótt en varð frá að hverfa eftir að tveir af lögreglumönnunum urðu fyrir skotsárum.

Mohammed Merah, sem er 24 ára gamall, er talinn hafa staðið að árásinni á gyðingaskóla í borginni í gærmorgun þar sem fjórir létu lífið þar á meðal þrjú börn.

Lögeglan hefur reynt að semja um uppgjöf við Merah síðan snemma í morgun en það hefur engan árangur borið.