James Cameron komst niður á 11 kílómetra dýpi

Kanadíski kvikmyndaleikstjórinn James Cameron komst í gærkvöldi niður á botn í Maríana-gilinu í Kyrrahafi eða niður á 11 kílómetra dýpi en í gilinu er mesta hafdýpi heimsins.

Cameron var einn á ferð í djúpsjárvarkafbát og það tók hann tvo tíma að komast niður á botn gilsins. Cameron hafði kvikmyndatökuvélar með sér og sterk kastljós en kafbáturinn þyrlaði upp svo miklu af botnleðju að leikstjórinn náði nær engum myndum af botninum þær 20 mínútur sem hann dvaldi þar.

James Cameron er m.a. þekktur sem leikstjóri mynda á borð við Titanic og Avatar. Raunar hefur hann skoðað flak Titanic í kafbáti.

National Geographic fylgdist með þessu afreki Cameron. Hér fyrir ofan má sjá skýringarmyndband gert í tilefni þess.