Yfirvöld í Sýrlandi samþykkja friðaráætlun

Yfirvöld í Sýrlandi hafa samþykkt friðaráætlun sem sett var fram af Sameinuðu Þjóðunum og Arababandalaginu í síðustu viku.

Erindreki bandalagsins í Sýrlandi, Kofi Annan, sagði að samþykki ríkisstjórnar Bashar al-Assads sé nauðsynlegur liður í sáttaferlinu og að nú gefist loks tækifæri á að stilla til friðar í landinu.

Friðaráætlunin gerir ráð fyrir að öryggissveitir og andspyrnuhópar í landinu leggi niður vopn sín. Sameinuðu Þjóðirnar munu hafa umsjá með vopnahléinu.

Annan telur að friðaráætlunin gefi tækifæri á pólitískri úrlausn á átökunum í Sýrlandi en þau hafa staðið yfir í rúmt ár.