Fórnarlamb hópnauðgunar lést á spítala

Átján ára gömul stúlka í Úkraínu lést í dag af sárum sínum á spítala, en henni hafði verið nauðgað hrottalega af þremur mönnum fyrr í mánuðinum.

Árásin átti sér stað í borginni Mykolayiv í suðurhluta landsins 8. þessa mánáðar en málið hefur vakið gríðarlega athygli landsmanna.

Þrír menn veittust að Oksönu Makar við auða byggingalóð og nauðguðu. Þeir reyndu að kyrkja hana og brenndu hana síðan. Stúlkan fannst daginn eftir og var lögð inn á spítala stuttu seinna. Hún var með brunasár á 55% líkamans og voru öndunarfæri hennar mikið sködduð.

Talið er að stúlkan hafi látist eftir að það blæddi inn á lungu hennar.

Þrír menn voru handteknir grunaðir um aðild að málinu. Tveimur var sleppt stuttu seinna en foreldrar þeirra hafa tengsl við yfirvöld í Úkraínu.

Málið hefur vakið mikla athygli í landinu og krefjast margir þess að tekið verði á pólitískri spillingu.