Merah á að hvíla í Frakklandi segir Sarkozy

Nicolas Sarkozy, forseti Frakklands, sagði fyrir stuttu að fjöldamorðinginn Mohamed Merah ætti að fá að hvíla í Frakklandi.

Borgarstjórinn í Toulouse fór fram á að jarðarför Merah yrði frestað en hún átti að fara fram í dag. Hann taldi útförina ekki vera viðeigandi.

Merah var felldur af sérsveit frönsku lögreglunnar í Toulouse í síðustu viku. Hann er grunaður um að hafa myrt sjö manns í suðurhluta Frakklands á síðustu vikum, þar af þrjú börn við gyðingaskóla í Toulouse.

Fjölskylda Merah fór upphaflega fram á að Merah yrði jarðaður í Alsír. Yfirvöld þar í landi hafa þó neitað að taka við líki Merah af öryggisástæðum.