Dagbjört og Aðalheiður í efstu sætum

Nítján stúlkur frá Íslandi tóku þátt í Arnold 2012 mótinu í Ohio í Bandaríkjunum í dag. Dagbjört Guðbrandsdóttir lenti í fyrsta sæti í sínum flokki og Aðalheiður Ýr Ólafsdóttir tók annað sætið.

Á mótinu er keppt í aflraunum, vaxtarækt og fitness. Rúmlega 175.000 fylgjast með mótinu.

Mikil stemning var í salnum þegar íslensku stúlkurnar stigu á svið og hefur frammistaða þeirra vakið mikla athygli.

Dagbjört og Aðalheiður kepptu í svokölluðum bíkiní-flokki og hrepptu tvö efstu sætin eins og áður segir.

Hægt er að fylgjast með nýjustu fréttum af Arnold 2012 á heimasíðu Vöðvafíkn.