Ofurþriðjudagur er í dag hjá Repúblikönum

Hinn svokallaði ofurþriðjudagur er í dag í prófkjörum Repúblikanaflokksins í Bandaríkjunum. Kosið verður í 10 ríkjum og geta úrslitin í þeim ráðið miklu um hver verður forsetaefni flokksins í kosningunum í haust.

Eitt mikilvægasta prófkjörið er í Ohio en þar hefur Mitt Romney naumt forskot á Rick Santorum. Skoðanakannanir mæla Romney með 34% fylgi en Santorum með 31%.

Romney þykir eiga sigur vísan í Vermont, Massachusetts og Virginíu en Santorum aftur á móti í Oklahoma og Tennessee.

Newt Gingrich er spáð sigri í Georgíu en það er heimaríki hans. Gingrich hefur sagt að vinni hann ekki í Georgíu sé hann hættur baráttu sinni.