Victoria Svíaprinsessa eignast fyrsta barn sitt á næstu dögum

Von er á að nýr prins eða prinsessa komi í heiminn í Svíþjóð á allra næstu dögum. Um er að ræða fyrsta barn Viktoríu krónprinsessu Svíþjóðar og Daniels eigmanns hennar.

Viktoría er kasólétt en hún átti ekki að fæða þetta fyrsta barn sitt fyrr en næsta mánuði. Hinsvegar bendir allt til þess að hinn nýi ríkiserfingi Svía verði fyrr á ferðinni. Raunar hefur Silvia Sommerlath móðir Viktoríu sagt að fæðingin verði á allra næstu dögum.

Sænskir fjölmiðlar greina frá því að hluta af bílastæðum við Karólínska háskólasjúkrahúsið í Solna, þar sem tekið verður á móti barninu, hefur verið lokað og lögreglan hefur sett upp öryggisgirðingar við helstu götur sem liggja að sjúkrahúsinu.