Stjörnufræðingar uppgötva nýja fjarreikistjörnu

Stjörnufræðingar í Bandaríkjunum hafa uppgötvað nýja „ofur-jörð." Plánetan er þakin vatni og er andrúmsloft hennar þykkt og gufukennt. Tilvist hennar kallar á nýja flokkun pláneta.

Athuganir Hubble geimsjónaukans gefa til kynna að vatn sé til staðar á plánetunni.

Tilvist plánetunnar GJ 1214b var fyrst áætluð árið 2009. Með því að nota stjörnusjónauka hér á jörðu niðri gátu stjarneðlisfræðingar greint þvermál hennar og massa. Plánetan er 2.7 sinnum stærri en Jörðin og sjö sinnum þyngri.

Plánetan fellur því í flokkinn „ofur-jörð" því hún er minni en gasrisar sólkerfisins en jafnframt stærri en Jörðin.

GJ 1214b er á sporbraut um rauða dvergstjörnu og er í 2 milljón kílómetra fjarlægð frá henni. Þetta þýðir að hitastig plánetunnar er líklega hærra en 200 gráður.

Talið er að yfirborð plánetunnar sé mestmegnis vatn. Þó er möguleiki á að einhvers konar þokumóða umlyki plánetuna - rétt eins og á tungli Satúrnusar, Títan.