OECD: Offituvandamálið fer vaxandi

Ný skýrsla frá OECD samtökunum sýnir að hvorki gengur né rekur í baráttunni gegn offitu meðal aðildarlanda samtakanna.

Japan og Suður Kórea eru sem fyrr þau lönd sem standa sig best gegn offituvandamálinu. Aðeins um 4% íbúa þessara landa þjáist vegna offitu. Hinsvegar er þetta vandamál hjá um 30% íbúa Bandaríkjanna og Mexíkó. Ísland er síðan ekki langt á eftir þessum Norður-Ameríkuþjóðum en yfir 20% Íslendinga, karlar og konur, þjást af offitu.

Skýrsla OECD dregur upp dökka mynd af offituvandamálinu í dag og líklegri þróun þess í nánustu framtíð. Þannig segir að í yfir helmingi aðildarlanda samtakanna sé yfir helmingur þjóðarinnar yfir kjörþyngd. Og ef ekkert verður að gert muni um tveir þriðjuhlutar íbúa í ákveðnum löndum vera ofþungir innan næstu tíu ára.

OECD bendir á að offita sé ekki aðeins vaxandi heilbrigðisvandi heldur einnig efnahagsvandi. Offita auki mjög álagið á heilbrigðiskerfið fyrir utan að sífellt fleira fólk missir lífið vegna hennar.