Apple berst fyrir leyfi til að nota "iPad"

Tæknirisinn Apple og kínverska fyrirtækið Shenzhen Proview Technology tókust á í réttarsal í Kína í dag. Apple varði rétt sinn til að nota vörumerkið „iPad" í Kína.

Shenzhen Proview Technology ásakar Apple um að hafa notað vörumerkið í leyfisleysi. Fyrirtækið stóð í samningaviðræðum við Apple árið 2009.

Lögfræðingar Apple halda því fram að samningur um sölu á „iPad" hafi verið gerður á meðan kínverska fyrirtækið segir að samningurinn hafi ekki verið innsiglaður.

„Apple hefur engan rétt til að selja spjaldtölvur undir þessu nafni," sagði Xie Xianghui, lögfræðingur Shenzhen Proview Technology.

Apple svaraði ásökunum með því að vísa í framleiðslusögu Shenzhen Proview Technology og benti á að fyrirtækið hafi ekki framleitt eða selt spjaldtölvur merktar „iPad" árum saman.

Vitni segja að mikið hafi gengið á í réttarsalnum og að lögfræðingar Apple og Shenzhen Proview Technology hafi margsinnis verið áminntir af dómara.

Ekki er vitað hvenær réttarhöldin halda áfram eða hvenær niðurstaða mun liggja fyrir.