Kristjaníubúar þurfa að fá bankalán

Kristjaníubúar verða að leita á náðir banka eða fjármálafyrirtækja ef þeim á að takast að halda eign sinni á Kristjaníu.

Í samkomulagi við dönsk stjórnvöld er gert ráð fyrir að Kristjaníubúar borgi tæplega 52 milljónir danskra króna fyrir Kirstjaníusvæðið og hafa frest til 1. júlí að reiða fram þá fjárhæð.

Sala á svokölluðum almenningshlutum í Kristjaníu hefur aðeins gefið af sér 6,6 milljónir danskra króna hingað til. Í fréttum í dönskum fjölmiðlum segir að því þurfi bankalán að koma til.

Það bætir stöðu Kristjaníubúa að stjórnvöld hafa lofað ríkisábyrgð á 80% af þeirri upphæð sem Kristjaníubúar þurfa að fá að láni.