Afmæliskveðja flugmanns túlkuð sem hryðjuverkaárás

Flugmaður neyddist til að róa taugaveiklaða farþega eftir að afmæliskveðja hans var misskilin.

Atvikið átti sér stað um borð í breiðþotu flugfélagsins Southwest Airlines. Starfsmaður í flugturn MacArthur flugvallarins bað flugmanninn um að skila kveðju til móður sinnar sem var farþegi í flugvélinni.

Flugmanninum fannst þetta vel til fundið og snéri sér að kallkerfi flugvélarinnar. Því miður voru orð hans misskilin.

„We have a mom on Board," sagði flugmaðurinn. Grunlausir farþegar túlkuðu „mom" sem „bomb" og mikið óðagot myndaðist í kjölfarið.

Flugmaðurinn þurfti að stíga úr flugstjórnarklefanum og ávarpa farþegana. En farþegarnir voru ekki allir sannfærðir og hafa nokkrir kvartað til Soutwest Airlines vegna atviksins.

Í tilkynningu frá flugfélaginu kemur fram að tilkynning flugmannsins hafi verið misskilin og er beðist afsökunar á atvikinu.