Íhuguðu að rýma Tókíó

Í nýrri óháðri skýrslu um kjarnorkuslysið í japönsku borginni Fukushima segir að yfirvöld hafi alvarlega íhugað að rýma Tókíó, eina stærstu borg heims, þegar ástandið var sem alvarlegast.

Skýrslan, sem unnin er af óháðum samtökum og skrifuð af 30 háskólakennurum sýnir glögglega þá ringulreið sem ríkti í Japan eftir að öflugur jarðskjálfti reið yfir og stór flóðbylgja fylgdi í kjölfarið með skelfilegum afleðingum þann ellefta mars í fyrra.

Verst var ástandið í kjarnorkuverinu í Fúkushima og í skýrslunni er varpað ljósi á þá samskiptaörðugleika sem á stundum voru á milli japanskra stjórnvalda og rekstraraðila kjarnorkuversins.

Þetta olli misvísandi fregnum af ástandinu og það sem verra var, gerði framkvæmdastjóra versins, sem stjórnaði aðgerðum á staðnum afar erfitt fyrir. Hann þurfti til að mynda að rífast við æðstu embættismenn Japan til að koma þeim í skilning um að best væri að halda starfsólkinu á staðnum til að kæla verið, á meðan yfirmenn hans hjá fyrirtækinu reyndu að fá starfsfólkið flutt á brott.

Nú er ljóst að slík ákvörðun hefði haft skelfilegar afleiðingar. Þegar ástandið var sem verst, í kjölfar öflugra sprenginga í verinu, íhuguðu stjórnvöld alvarlega að rýma höfuðborgina Tókíó en þar búa um þrettán milljónir manna.