Sektuð fyrir að hlusta á Rihanna

Par í Bretlandi hefur verið sektað fyrir að hlusta of hátt á plötur söngkonunnar Rihanna. Þau voru afar ósátt við niðurstöðuna og sögðu fyrir rétti að tónlist söngkonunnar hentaði öllum og að hún væri afar myndarleg.

Sean Brough og Lyndsey Smith voru sektuð um 1.215 pund eða um 230.000 krónur. Nágrannar þeirra höfðu ítrekað kvartað yfir háværri tónlist úr íbúð parsins.

Sean og Lyndsey voru dregin fyrir dómstóla á föstudaginn og var dómurinn kveðinn upp samdægurs.

En parið hefur lýst yfir sakleysi sínu. Þau segja að þau og synir þeirra Kailam, Reagen og Kean séu öll miklir aðdáendur Rihanna og segja að dómurinn sé ósanngjarn.

„Við erum ung fjölskylda," sagði Sean. „Þegar börnin fara til foreldra minna þá langar okkur að hlusta á tónlist og skemmta okkur."

„Tónlist Rihanna er frábær og við elskum plöturnar hennar. Það skemmir ekki fyrir að hún er mjög falleg. Jafnvel Kailem litli elskar hana."