Paul McCartney fær stjörnu í Hollywood

Bítillinn Paul McCartney hefur loks fengið stjörnu með nafni sínu á gangstéttina í Hollywood. Tæp 20 ár eru síðan McCartney hlaut tilnefninguna.

Stjarna McCartneys, sem er síðasti bítillinn til að fá nafn sitt steypt í stein, situr fyrir utan Capital Records bygginguna í Hollywood. Þeir Ringo, George og John eru við hlið hans á gangstéttinni.

Stjarnan var opinberuð í gær og voru um 2.000 manns samankomin til fagna með McCartney. Þar á meðal var Neil Young en hann er góðvinur McCartneys.

„Þetta er óhugsandi heiður," sagði McCartney. „Þegar við vorum ungir piltar í Liverpool, hlustandi á Buddy Holly, var þetta ómögulegur áfangi."