Ætlaði að drepa Obama

Tuttugu og tveggja ára maður frá Úsbekistan hefur játað að hafa skipulagt að drepa Barack Obama forseta Bandaríkjanna. Maðurinn hefur búið í Bandaríkjunum undanfarin ár og var handtekinn í leynilegri aðgerð lögreglu til að komast yfir ólögleg skotvopn og sprengjur eftir því sem Sky News fréttastofan hefur eftir bandaríska dómsmálaráðuneytinu.

Maðurinn játaði fyrir dómi í Alabama að hafa stutt við hryðjuverkastarfsemi, hótað að drepa forsetann og haft í sinni vörslu ólögleg skotvopn. Hann er talinn tilheyra íslömskum hryðjuverkasamtökum í Úsbekistan og hann hafi fengið fyrirmæli um að drepa Obama. Hann á yfir höfði sér allt að þrjátíu ára fangelsi.