Játar að hafa rænt barni fyrir 23 árum og alið upp sem sitt eigið

Ann Pettway hefur játað að hafa rænt nítján daga gömlu stúlkubarni af spítala í Harlem árið 1987 og alið upp sem eigin dóttur. Málið vakti heimsathygli á síðasta ári þegar greint var frá því að Caralina White hefði leyst eigin ráðgátu, þegar hún uppgötvaði, 23 ára gömul að henni hefði verið rænt í æsku.

Hún ólst upp undir nafninu Nejdra Nance í Connecticut hjá Pettway. Hún ákvað að grennslast fyrir um uppruna sinn, því hún sagðist alltaf haft það á tilfinningunni að móðir hennar væri ekki líffræðilega tengd sér.

Hún fór fram á að móðir sín bæri saman DNA-sýni sitt við sín eigin til að fá grun sinn staðfestann. Eftir að niðurstöður lágu fyrir kom í ljós að hún var ekki dóttir „móður sinnar" heldur væri kona að nafni Joy White móðir hennar.

Pettway var í kjölfarið ákærð fyrir barnsránið en hún neitaði sök í fyrstu. Nú liggur fyrir játning og hún má búast við að vera dæmd í 12 ára fangelsi.

Móðir stúlkunnar, Joy White, segir í viðtali við BBC að Pettway ætti að dúsa í fangelsi í 23 ár, eða fyrir hvert ár sem hún hélt stúlkunni frá raunverulegum foreldrum sínum.